श्री विठ्ठल कारखान्याचे विठ्ठल मंदिरात अखंड हरिनाम सप्ताह सोहळयाची सांगता

वेणुनगर पंढरपूर---

कारखाना कार्यस्थळावरील श्री विठ्ठल रुक्मिणी, श्रीराम-लक्ष्मण-सीता, मारूती या देवतांची प्राणप्रतिष्ठा वर्धापन दिनानिमित्त व जगद्‌गुरु संत तुकोबाराय यांच्या त्री शतकोत्तर अमृत बिजोत्सावानिमित्तचे औचित्य साधून प्रतिवर्षी प्रमाणे अखंड हरिनाम सप्ताहाचे आयोजन केले जाते. त्याप्रमाणे याहीवर्षीं दिनांक ०९.०५.२०२४ ते १५.०५.२०२४ या कालावधीमध्ये अखंड हरीनाम सप्ताह व भागवत कथा ज्ञानयज्ञ सोहळाचे आयोजन केलेले होते.

कारखान्याचे चेअरमन मा. श्री अभिजीत धनंजय पाटील यांचे मार्गदर्शनाखाली तसेच संचालक मंडळाच्या उपस्थितीत व ह.भ.प.प्रा.श्री तुकाराम महाराज मस्के, ह.भ.प.श्री आण्णा महाराज भुसनर यांचे नेतृत्वाखाली अखंड हरिनाम सप्ताह व भागवत कथा ज्ञानयज्ञ सोहळ्याचे आयोजन केले होते. या सोहळ्यामध्ये पहाटे ४ ते ६ काकड, सकाळी १० ते १२ संत तुकाराम महाराज गाथा भजन, दुपारी ४ ते ५ हरीपाठ, सायं. ५ ते ७ भागवत कथा, रात्री ८ ते १० किर्तन व रात्री ११ ते ४ हरी जागर इत्यादी दैनंदिन कार्यक्रमाचे आयोजन केलेले होते. त्यामुळे परिसरातील भाविक भक्तांमध्ये आनंदाचे वातावरण निर्माण होऊन कारखाना परिसर भक्तीमय झालेला होता. तसेच दररोज सायं ५ ते ७ या वेळेमध्ये ह.भ.प. संगीत विशारद भागवताचार्य सौ. राणीताई सिदवाडकर करकंब यांचे भागवत कथा ज्ञानयज्ञाचेही आयोजन केलेले होते. सदर कथेच्या श्रवणास कारखाना कॉलनी व परिसरातील महिलांचा चांगला प्रतिसाद मिळालेला आहे. सप्ताहामध्ये कारखान्याचे अधिकारी, कर्मचारी व परिसरातील नागरिकांनी अन्नदान करणेसाठी मोठा सहभाग नोंदविलेला होता.

या सप्ताहाची सांगता भव्यदिव्य दिंडी नगर प्रदिक्षणा व ह.भ.प.डॉ.श्री किरण महाराज बोधले, श्री संत माणकोजी महाराज यांचे वंशज श्रीक्षेत्र पंढरपूर यांचे काल्याचे किर्तनाने झाली. ह.भ.प.डॉ. श्री किरण महाराज बोधले यांनी अनेक अध्यात्मिक उदाहरणे देवुन काल्याचे किर्तनाचे महत्व सांगितले. आपल्या अध्यात्मिक शैलीमध्ये बोलताना ते म्हणाले की, श्री विठ्ठल कारखान्याची धुरा हुशार व्यक्तीमत्व असणाऱ्या अभिजीत पाटील यांच्या सारख्या युवा नेतृत्वाकडे सोपविल्याने सर्व सभासदांचा व परिसराचा सर्वांगीण विकास करणेसाठी आशिर्वाद दिले. तत्पुर्वी दिंडी नगरप्रदिक्षणामध्ये प्रशालेच्या विदयार्थी व विदयार्थींनी वेगवेगळ्या आकर्षक वेशभुषेत मोठ्या प्रमाणात सहभाग घेवुन पंचक्रोशीतील लोकांची मने आकर्षित केली. काल्याच्या नंतर महाप्रसादाचा सर्वांनी आस्वाद घेतला.

सदर कार्यक्रमासाठी सर्व संचालक मंडळ, प्र. कार्यकारी संचालक श्री डी. आर. गायकवाड, सभासद, अधिकारी, कर्मचारी व कामगार तसेच परिसरातील असंख्य भाविक भक्तांच्या उपस्थितीत हरीनाम सप्ताहाचा सांगता समारंभ संपन्न झाला.

कार्यक्रम यशस्वी पार पाडलेबद्दल कारखान्याचे संचालक तुकाराम मस्के सर यांनी सर्वांचे आभार मानले.